Joh 17 | NdeIBE | STEP | UJesu esekutshilo lokhu, wakhangela ezulwini wakhuleka wathi: “Baba, isikhathi sesifikile. Khazimulisa iNdodana yakho, ukuze iNdodana yakho ikukhazimulise.

John 17

UJesu Uyazikhulekela Yena

1 UJesu esekutshilo lokhu, wakhangela ezulwini wakhuleka wathi: “Baba, isikhathi sesifikile. Khazimulisa iNdodana yakho, ukuze iNdodana yakho ikukhazimulise. 2 Ngokuba wayinika amandla phezu kwabantu bonke ukuthi ibaphe ukuphila okungapheliyo kubo bonke labo obanike yona. 3 Manje-ke yilokhu ukuphila okungapheliyo: ukuthi bakwazi wena, onguwe wedwa uNkulunkulu weqiniso, uJesu Khristu omthumileyo. 4 Sengikulethele inkazimulo emhlabeni ngokuphelelisa umsebenzi owanginika wona ukuthi ngiwenze. 5 Manje, Baba, akungikhazimulise phambi kwakho ngaleyonkazimulo engangilayo lawe umhlaba ungakabi khona.

UJesu Ukhulekela Abafundi Bakhe

6 “Ngikuvezile kulabo owangipha bona emhlabeni. Babengabakho; wangipha bona njalo labo balilalele ilizwi lakho. 7 Khathesi sebesazi ukuthi konke lokho onginike khona kuvela kuwe. 8 Ngoba ngabanika amazwi owanginika wona bona bawemukela. Bakwazi ngeqiniso ukuthi ngavela kuwe, njalo bakholwa ukuthi ungithumile.

9 Ngikhulekela bona. Kangikhulekeli umhlaba, kodwa labo onginike bona, ngoba bangabakho. 10 Konke engilakho kungokwakho, lalokho konke olakho kungokwami. Lenkazimulo isikimi ngabo.

11 Kangisayikuhlala emhlabeni kusukela kulesi isikhathi, kodwa bona balokhu besemhlabeni, mina ngiza kuwe. Baba Ongcwele, bavikele ngamandla ebizo lakho – ibizo owanginika lona – ukuze babe munye njengalokhu thina simunye. 12 Ngathi ngiselabo ngabavikela ngabagcina bephephile ngalelobizo owanginika lona. Kakulahlekanga loyedwa ngaphandle komntwana wesihogo ukuze kugcwaliseke uMbhalo.

13 “Sengisiza kuwe manje, kodwa ngiyazitsho lezizinto ngisesemhlabeni, ukuze babe layo ngokugcweleyo intokozo yami ngaphakathi kwabo. 14 Ngibaphile ilizwi lakho ngakho umhlaba usubazondile, ngoba bengaseyibo bomhlaba njengoba lami ngingasuye womhlaba. 15 Umthandazo wami kawusikho ukuthi ubasuse emhlabeni kodwa ukuthi ubavikele komubi. 16 Kabasibo bomhlaba, njengoba lami ngingasiwawo.

17 Bangcwelise ngalo iqiniso; ilizwi lakho liliqiniso. 18 Njengalokhu wangithuma emhlabeni, lami ngibathumile emhlabeni.

19 Ngenxa yabo ngiyazingcwelisa ukuze labo bangcweliswe ngoqotho.

UJesu Ukhulekela Wonke Amakholwa

20 “Umthandazo wami kawusiwo wabo bodwa. Ngikhulekela njalo labo abazakholwa kimi ngenxa yobufakazi babo, 21 ukuthi bonke babemunye, Baba, njengoba wena ukimi lami ngikuwe. Sengathi labo bangaba kithi ukuze umhlaba ukholwe ukuthi ungithumile. 22 Ngibaphile inkazimulo owangipha yona, ukuze babe munye njengalokhu thina simunye: 23 mina ngibe kubo lawe ukimi. Sengathi bangaba lokumanyana okupheleleyo ukutshengisa umhlaba ukuthi ungithumile njalo ubathandile njengalokhu ungithandile mina.

24 “Baba, ngifuna ukuthi labo ongiphe bona babe lami lapho engikhona, njalo bayibone inkazimulo yami, inkazimulo onginike yona ngoba wangithanda umhlaba ungakadalwa.

25 “Baba Olungileyo, loba umhlaba ungakwazi, mina ngiyakwazi, njalo bayakwazi ukuthi ungithumile. 26 Ngikuvezile wena kubo njalo ngizaqhubeka ukwenza ukuthi waziwe ukuze kuthi uthando olalo kimi lube ngolwabo njalo lokuthi mina ngokwami ngibe kubo.”